Pröm bilanz provisore

Tla relaziun finala dl 1988 á Steger fat do i pröms trëi agn n pröm bilanz provisore. L’istituziun ê aladô de Steger „gnüda tuta sö dër bun y ê te vigni caje n arichimënt por la Provinzia“. Mo n valgönes cosses ê ciamó da mioré. Sce zacai chir sö le defensur popolar ne pó chësc nia gní odü dales istituziuns sciöche n afrunt y ester porchël plü de dann co n bëgn por le zitadin. Implü ti destürba le comportamënt che le personal dla Provinzia á datrai. Al scrí porchël: „É l’impiegat a desposiziun dl zitadin o él le contrar? Tres indô vëgnel porté dant plüres che val’ impiegat é zënza cheriënza y se comporta mal ti confrunc di zitadins. I direturs d’ofize ne pó nia lascé pro chësc.“ Indô contestëia Steger la lege sön la Defenüda zivica deach’al l’arata nia plü atuala. Dantadöt l’art. 2 (dërt de intervenziun passif) y l’art. 3 (prozedöra burocratica) dess gní mudé le plü debota ch’ara vá. Ciamó do trëi agn da canch’al é gnü metü sö le defensur popolar vëgnel tres ciamó odü sciöche n avocat debann y chirí porvia de litighes te chestiuns privates. An damana do respostes sön litighes en cunt de chestiuns de termi, de prescriziuns, de afic, de ghiravanzes y ciamó d’ater. Chiló menâ Steger i zitadins ti ofizi competënc.

Steger se damanâ implü ch’al vëgnes desmendrí le numer dles leges provinziales, deach’al é ri da les capí dantadöt porvia di tröc emendamënc. Implü dess i tesć ester plü scëmpli y plü unitars. Sciöche ejëmpl negatif por chësc dál tres indô dant la urbanistica y le frabiché.

La nasciüda dla Defenüda zivica ê inće na conseguënza indireta dl Pachet o plü avisa dles competënzes desvalies che ti gnô surandades dal Stat y dala Regiun ala Provinzia. Steger confrontâ porchël ion l’aministraziun provinziala cun n’aziënda artejanala, deventada te püc agn n’aziënda industriala cun n gröm de personal. Inlaota êl 6.500 porsones che laurâ tl’aministraziun provinziala. N te’ „svilup“ ne sozed sambëgn nia dagnora zënza problems. Al é zënzater saurí ch’al vëgnes sö dificoltés y confujiun canch’al vëgn dé inant les competënzes. Steger odô porchël de bun edl la reforma dl’aministraziun provinziala, che â metü man tl 1989.