Por le pröm iade n’ëra a ce dla Defenüda zivica

Do da Werner Palla gnôl metü cun Burgi Volgger por le pröm iade te Südtirol n’ëra sciöche defensuria popolara. La iurista, insegnanta dles scores altes y mediadëssa te chestiuns penales s’â fat n inom sciöche presidënta dl’assoziaziun „La strada - Der Weg“. Chësta assoziaziun manajëia les abitaziuns por jogn te dificoltés, i zëntri jonii y na comunité de terapia por drogá te Südtirol. D’aurí dl 2004 á Burgi Volgger surantut l’inciaria. Da daimpröma incá sotrissâ Burgi Volgger che la Defenüda zivica ê dantadöt n mediadú y ara se porvâ da atira da mioré la comunicaziun cun i ofizi y i impiegac. Ara porvâ da mostré sö trus nüs y da daurí portes nöies. Cun so laur de convinziun ê les tenjiuns y i preiudizi ti confrunc dla Defenüda zivica gnüs demanco. I pröms früc ê da odëi tla colaboraziun cun les unités sanitares. Tl 2004 gnôl metü sö ti ospedai da Balsan y Maran grups de laur che se dê jö cun les retlamaziuns portades dant ala Defenüda zivica. Ince na colaboradëssa dla Defenüda zivica, che Volgger â inciarié sciöche esperta por les chestiuns di paziënc, tolô pert a chëstes incuntades.

Te so pröm ann d’ativité êl sté passa 2.500 zitadins che â damané aiüt pro la Defenüda zivica. N terz de ëi se sintî tratá iniustamënter o nia sciöch’al alda tl’aministraziun publica y chirî sostëgn da pert dla defensuria popolara. Le numer de chisc zitadins chersciô da ann a ann. N ater terz ê zitadins che chirî consëi, che n’orô gonot nia deplü co na consulënza debota y neutrala da pert dla Defenüda zivica.
L’ultim terz ê metü adöm da dui grups. Chi zitadins che â bele baié cun düc i ofizi y politics y che damanâ, gonot ince por blota desperaziun, sciöche ultima istanza la Defenüda zivica. Volgger scrí te süa relaziun anuala, „ch’ara se trata chiló por le plü de caji zënza speranza“. Te chi caji â la Defenüda zivica le dovëi da ti lascé alsavëi ai zitadins ch’ai ne podô nia gní destrigá aladô de sü dejiders. Le secundo grup ê metü adöm da porsones cun dificoltés personales, gonot rová te na situaziun de bojëgn sozial ince zënza n’avëi degöna colpa. Chisc â debojëgn de n sostëgn material concret plü co de na consulënza iuridica. Aladô dla situaziun gnôi mená inant da öna dles tröpes istituziuns soziales publiches y privates dla Provinzia, cun chëres che la Defenüda zivica â da dagnora n bun contat. Tl 2007 á por le pröm iade passa 3.000 porsones chirí aiüt y consëi pro le defensur popolar.

Te so pröm ann de ativité á trëi d’atri comuns stlüt jö la convenziun cun la Defenüda zivica. Insciö podô por le pröm iade passa le 50 porcënt di comuns y passa le 70 porcënt dla popolaziun damané le defensur popolar de comun do informaziuns. Le numer dles segnalaziuns y reclamaziuns ê resté inant alt, cun tres deplü caji por desturbs gaujá da la gran vera de locai publics y dl trafich tres maiú.
Nia ma zitadins, mo ince ombolc periâ la Defenüda zivica do informaziuns por podëi traté cer caji plü debota y te na manira nia burocratica.