La popolarité dla Defenüda zivica crësc inant

Tl 1997 n’á le defensur popolar nia scrit la relaziun anuala. Palla l’á spo scrita l’ann dedô cun la motivaziun ch’al manciâ le personal. Tl medem tëmp se baudiâl ince che „i politics y i aministradus desmostra püch interes por la relaziun anuala“. Tl 1998 á passa 2000 porsones tut sö contat cun i colaboradus dla Defenüda zivica. Palla arata ch’al é tres deplü porsones che vá dal defensur popolar, deache da öna na pert é l’ istituziun tres plü conesciüda, ince por mirit dles tröpes conferënzes y incuntades publiches ch’al á metü a jí. „Dal’atra pert él gnü lapró deplü ciamps olach’an pó intergní“, scrí Palla te süa relaziun anuala. Sciöch’al é jü en forza l’articul 16 dla lege statala n. 127/97 gnôl detlaré che la Defenüda zivica ê tles regiuns y provinzies autonomes ince competënta por les aministraziuns periferiches dl stat, cun ezeziun dla defenüda, dla segurëza publica y dla iustizia. Le defensur popolar ê bele denant intergnü pro i ofizi statai, ince sce cun de manco pëis y forza. Cun la lege statala gnôl sëgn legitimé chësta situaziun.
Tla relaziun anuala dl 1998 ciafunse por le pröm iade n conzet che nes acompagnará ciamó por tröc agn: le „mobbing“. Tres deplü porsones che laora tl’aministraziun publica patësc por problems psicologics. Palla â fat porchël bele tl 1998 la proposta da mëte sö n „sorvisc psicologich dl’aziënda“.

Na spina te n edl ê por Palla dagnora chi impiegac y chës istituziuns, che refodâ da lauré adöm cun la Defenüda zivica. Te n valgügn caji s’essel porchël ion damané l’intervënt dl organ disciplinar por straufé cer personal, sciöche odü danfora dala lege. Mo ala fin ne l’á Palla mai fat, ince deach’al aratâ ch’al ne foss nia dërt che te chisc caji ne gnô i funzionars y i assessurs nia tratá anfat. Deperpo che le impiegat ess podü ciafé na straufunga disciplinara, ne varô chësc nia por l’assessur reponsabl te chësc ciamp. Por le plü fajô i impiegac ma ci che le politich comanâ, che ne podô nia gní straufé por so comportamënt nia cooperatif. Palla pretenô tres indô ch’al gniss metü a jí cursc de formaziun obligatori por i impiegac dl’aministraziun. Le dër raport cun les porsones pón imparé, aratâ Palla. Gonot ê l’aministraziun massa dalunc dai zitadins. „L’impiegat n’é gonot nia empatich, al ne se sënt porchël nia ite tla situaziun dl zitadin. Al ne vëgn nia ma damané da ester valënc, mo an adora ince na competënza profescionala, ciodiche na resposta valënta mo falada é baldi ince fatala. Y al ne basta gnanca che l’informaziun sides dërta y vëgnes dada cun cherianza, sc’ara vëgn spo formulada te n lingaz burocratich nia da capí“, scrí Palla te süa relaziun anuala dl 1995. Le zitadin n’é nia n sotmetü dl stat, mo n partner dl’aministraziun publica.

Ai 3 de merz dl 1999 ê Palla gnü confermé defensur popolar por la dorada de n’atra perioda legislativa.
Tl 2000 él indô rot fora n conflit davert danter le defensur popolar Palla y le presidënt dl Consëi provinzial Hermann Thaler (SVP). De messé dl 2000 orô Thaler porté inant do so ce n valgönes mudaziuns tla lege sön la Defenüda zivica. Ara nen jô dantadöt dla competënza dl defensur popolar ti comuns. Le presidënt dl Consëi provinzial y nia sciöche cina ciamó le defensur popolar, dô stlüje jö la convenziun cun i comuns. Palla refodâ indere chësc punt y tla lege deliberada dal Consëi provinzial él scrit „Le defensur popolar (...) pó stlüje jö cun i comuns (...) n’acordanza“. Implü orô Thaler che i comuns paiass n contribut por l’ativité dl defensur popolar. Le regolamënt varënt cina iló odô danfora che le Consëi provinzial de Südtirol podô fissé n contribut. Palla se temô „che sce i comuns mëss paié por le laur dl defensur popolar spo ne gnarál nia plü tut en conscidraziun y chësc ne podess dessigü nia ester n bëgn por le zitadin dla Provinzia“. Do na discusciun plü lungia gnô les propostes de mudaziun tlafinada trates zoruch da Thaler.