Informaziun y comunicaziun

Da canch’al é gnü metü sö la Defenüda zivica s’á Südtirol dassënn mudé. L’istituziun s’á intratan etablé, la Defenüda zivica s’á oramai fat n inom. Na inrescida dl ASTAT dl 2007 á mostré sö che trëi sön cater sudtirolesc conësc la Defenüda zivica, plü co mec sá ince ciönes che é sües funziuns. Porimpó röiel tres ciamó tröc zitadins adalerch cun idees falades sön la defensuria popolara. Ai mina che ëra sides na avocata debann por de vigni sort de litighes. Por ti sciampé a de te malintenüdes y por splighé le laur dla Defenüda zivica vëgnel stampé dal 2000 incá na brosciüra. Burgi Volgger á lauré fora la brosciüra „I dërc dl zitadin“ por le vintecinejim iubilé dl’istituziun, ara l’á abelida cun n valgönes caricatöres dl artist sudtirolesc Hanspeter Demetz y ti l’á menada a 55.000 families de Südtirol. „La Defenüda zivica pó ma porté inant süa ativité istituzionala te na manira efiziënta, sc’ara é conesciüda y sce i zitadins y les zitadines sá ciönes che é les funziuns y les competënzes dla defensuria popolara“, scrí Volgger te süa relaziun anuala dl 2008.

Dlungia la brosciüra te trëi lingac él ince gnü metü adöm na plata internet nöia sön la Defenüda zivica saurida d’adoré. Le portal nü pita por le pröm iade ince la poscibilité da porté dant reclamaziuns online. Da canche l’istituziun é gnüda metüda sö s’á la manira da tó sö contat dassënn mudé. Deperpo che i zitadins portâ dant sües chestiuns tla pröma fasa tan co dagnora personalmënter, nen êl cun le tëmp tres deplü che telefonâ. Tl 2005 á por le pröm iade deplü porsones telefoné impede baié personalmënter cun la Defenüda zivica. Dal 2006 incá vára ince da ti mené al’ istituziun reclamaziuns y interpelaziuns por e-mail. Les porsones mëna ion y gonot ite les reclamaziuns por e-mail. Tl 2007 á la Defenüda zivica registré pro les reclamaziuns portades dant por scrit por le pröm iade deplü reclamaziuns online co lëtres. Ince porchël é l’aiüt dl defensur popolar plü danman co mai. I zitadins pó porté dant sües chestiuns te n dialogh personal, por telefon, posta, fax, e-mail o ince online. Dlungia les udiënzes a Balsan tëgn la defensuria popolara regolarmënter udiënzes a Porsenú, Bornech, Maran, Neumarkt, Solaneres, Sterzing, Urtijëi y San Martin de Tor.

Ince i foliec ti dá lerch al’ativité dla defensuria popolara. Dal 2006 incá vëgnel fora dui iadi al mëis tl foliet da vigni de „Dolomiten” la rubrica „Ein Fall für die Volksanwaltschaft“ (N caje por la Defenüda zivica). Pian ia da caji concrec spliga Volgger le laur de süa istituziun. Dal 2008 incá ti vëgnel pite chësc sorvisc ince ai leturs talians che pó lí tl foliet da vigni dé „Alto Adige“ la rubrica „Il difensore civico risponde“ (incö ára le titul „La Difesa civica per te“). Cun dötes chëstes mosöres éra jüda da fá conësce ciamó deplü la Defenüda zivica. Chësc á albü conseguënzes diretes sön le laur dl’istituziun. Tl 2008 él sté por le pröm iade passa 3.000 porsones che á damané do n aiüt pro la Defenüda zivica y al é gnü traté por le pröm iade passa 1.000 caji nüs.