N gran laur de convinziun

Dal 1993 incá á i comuns de Südtirol la poscibilité da firmé na convenziun cun la Defenüda zivica. Cun chësta acordanza pó i zitadins di comuns damané la Defenüda zivica do chestiuns aministratives. Canche Volgger â surantut süa inciaria â indere apëna mec i comuns sotscrit chësta convenziun. Tl 2006 êl da mudé i statuc di comuns. Volgger ê piada ia cun na ofensiva generala ti menan na lëtra a düc i ombolc. „Dantadöt te comuns, olach’al é lians familiars strënc, damana i zitadins ion la Defenüda zivica, ciodich’ai la sënt sciöche n’istituziun independënta, che n’é nia trata ite te ci ch’al sozed te paisc. Sciöche düc sá, ince sce le comun laora sciöch’al alda, él porimpó zitadins che á val’ dübe sön les dezijiun tutes dai rapresentanc de comun“, scriô Volgger. Le resultat ê che düc i 116 comuns de Südtirol â metü te so statut ch’al vëgnes odü dant l’istituziun dla Defenüda zivica.

Volgger á investí tröp tëmp por se davagné la crëta di comuns. Te n gröm de dialogs personai cun i ombolc, i referënc y i secreters de comun ára porvé da splighé ciügn che ê i vantaji de na te colaboraziun. „Impormó canche i comuns á odü ite che la Defenüda zivica ê na oportunité por mioré l’ativité aministrativa y les relaziuns cun i zitadins, éra jüda da lauré adöm te na manira costrutiva“, sotliniëia Volgger tla relaziun anuala dl 2006. En chël ann á finalmënter 36 di 116 comuns sotscrit la convenziun. Dl 2007 él ciamó gnü d’atri diesc comuns lapró. Dl 2010 á cun Laiun (ai 14 d’aurí) y Türesc tla Val Müstair (ai 13 de ma) ince i ultims dui comuns firmé la convenziun. Aldedaincö s’á düc i comuns impegné da lauré adöm cun la defensuria popolara. Vigni zitadin dla provinzia pó damané la defenüda zivica tl caje de na litiga cun so comun. Le numer di caji tratá é porchël tres indô chersciü ti ultims agn. Gonot damana i zitadins la defensuria popolara, ciodich’al ti é gnü refodé da podëi ejaminé i documënc. Ti comuns él dlungia i problems iuridics gonot ince problems personai, propi chiló é na vijiun ogetiva da defora n gran vantaje por dötes les perts atocades dala litiga.

Tles gran cités de Südtirol Balsan, Porsenú y Maran él inće gnü chirí fora aposta porsones de referimënt competëntes, che se fistidiëia dl contat cun la Defenüda zivica. An á odü ite che chësc é valch dër de ütl, insciö é ince la colaboraziun cun les aministraziuns dër miorada.