De nos

La Defenüda zivica de Südtirol laora sön inciaria dl Consëi provinzial de Südtirol, ara ciara sura l’aministraziun publica te Südtirol y vëgn regolada dala Lege provinziala n. 11 di 9 de otober 2020.

Vigni zitadina y vigni zitadin pó contaté la defensuria popolara canch’al ti dá en mënt che l’aministraziun publica n’á nia lauré sciöch’al toca. La defensuria popolara mëss ti jí do a vigni lamentanza y ti lascé alsavëi ales porsones atocades ci ch’ara á ciafé fora. Implü pó ëra instëssa se ativé canch’al pé che l’aministraziun n’ais nia lauré bun. Ara controlëia, dá consëis y mediëia i conflic te chestiuns o prozedöres danter i zitadins y l’aministraziun publica.

Ara ciara ince ch’al vëgnes garantí, tignin cunt dles desposiziuns aladô, le dërt da ti rové pormez ai ac y ai documënc. La defensuria popolara dla Provinzia Autonoma de Balsan laora te na manira independënta y autonoma. Porchël mëssera gní litada dala maioranza cualificada dl Consëi provinzial.

Implü á la defensuria popolara na gran autonomia funzionala y n’é porchël nia sotmetüda al podëi diretif dl legisladú y ara é lëdia da fá inrescides y da lauré/scrí fora les racomanaziuns y so punt d’odüda.

L’autonomia dla defensuria popolara é implü garantida da deplü clausoles de incompatibilité dades dant por che la defensuria popolara ne röies nia te n conflit d’interes sc’ara ess val’ ativité pro val’ istituziun y.i.i (ciara art. 5 dla LP n. 11/2020).

Por podëi lauré indortöra y te na manira sinziera ól ester chësta independënza y al é zënzater dërt y d’ütl sc’an pó se confronté tresfora cun l’aministraziun.