La lege nöia regolamentëia la funziun dl defensur popolar

Cun l’art. 5 dla lege provinziala di 10 de jügn dl 2008 él gnü injunté tla lege sön le defensur popolar che ê bele le punt „programaziun y esecuziun dl’ativité“. Aladô de chësta desposiziun mëss le defensur popolar ti presenté anter i 15 de setëmber de vigni ann al presidium dl Consëi provinzial n program d’ativité cun lapró n preventif dles spëises dl ann do. Le presidium dl Consëi Provinzial mëss aprové chësc program, impormó dedô vëgnel lauré ite tl bilanz de previjiun dla Provinzia y porté dant a döt le Consëi Provinzial por podëi gní aprové. A chësta manira ciafa le laur dla Defenüda zivica cotan deplü pëis. Cina ciamó messâ la defensuria popolara fá na domanda al Presidënt dl Consëi Provinzial por vigni spëisa, impormó dedô podôra se dé da fá. Le regolamënt nü ê apontin n vare important tla direziun de n’independënza finanziara dla Defenüda zivica dal’aministraziun provinziala. „L’independënza, ince sc’an á tröpa autonomia tl laur y dötes les garanzies, é pö ma na mesa cossa, sc’al n’alda nia inće la independënza economica lapró“, insciö Volgger.

Ai 4 de forà dl 2010 ê spo la lege dl 1996 gnüda sostituida cun na lege nöia por le defensur popolar. Cun na unité surapartitica rera gnô la lege nöia surantuta tl Consëi Provinzial de Südtirol zënza usc decuntra y cun ma döes astenjiuns. Les novités plü importantes reverda la manira da chirí fora y nominé le defensur popolar. Al é ince gnü deplü competënzes lapró, tolon ite i conzescionars di sorvisc publics dla Provinzia y ince i intervënc por garantí le dërt da ti rové pormez a ac y documënc. La dorada dl’inciaria dl defensur popolar n’é nia plü liada ala perioda legislativa dl Consëi Provinzial. Chësta desposiziun é indere bele n ann dedô gnüda trata zoruch. La lege dá dant che la relaziun d’ativité anuala mëss gní portada dant tl Consëi provinzial y na manira plü flessibla da gestí le personal. Le personal vëgn chirí fora dal Consëi Provinzial en acordanza cun la defensuria popolara che pó tó sö colaboradus fora dl personal de chi ënc por chi che la Defenüda zivica é competënta. Da sëgn inant mëss les aministraziuns de competënza dla Defenüda zivica motivé sc’ares ne á nia tigní ite i tëmps dá dant por laoré sö n caje o sc’ares n’é nia a öna cun les racomanaziuns y les minunghes dla defensuria popolara.

Sciöche odü dant dala reforma nöia, é Burgi Volgger gnüda reconfermada te süa inciaria ai 10 de novëmber dl 2010 cun dui terc dla maioranza.