Compic nüs

Ala fin di agn Otanta gnôl amplié i ciamps de competënza dla Defenüda zivica. Cun la lege di 18 de agost dl 1988 nr. 33, articul 15 á le Consëi Provinzial fat fora che le defensur popolar podô intergní ince tl ciamp dla sanité. Chiló gnôl ti pröms agn tres indô sö les medemes plüres: fai tla cura, sistemaziun di amará por n tëmp plü lunch y problems da reconësce l’invalidité. Implü damanâ Steger le Consëi provinzial da podëi tó ite ince i comuns, sciöch’al sozedô bele tla provinzia vijina de Trënt. La lege statala di 8 de jügn dl 1990, nr. 142, articul 8, paragraf 1, „Ordinamënt di ënc locai“, jô te chësta direziun.

„Lo statuto provinciale e quello comunale possono prevedere l’istituto del difensore civico, il quale svolge un ruolo di garante dell’imparzialità e del buon andamento della pubblica amministrazione comunale o provinciale, segnalando, anche di propria iniziativa, gli abusi, le disfunzioni, le carenze ed i ritardi dell’amministrazione nei confronti dei cittadini.“

A livel local, chël ó dí comunal, dôl gní metü sö n defensur di zitadins aposta. Le momënt plü important dl ann ê por Steger le secundo congres europeich di defensurs popolars. „Te na democrazia ciafa la sconanza di zitadins tres na maiú importanza“, scríel te süa relaziun finala. Le consëns danter zitadins y govern ará n pëis tres maiú tl dagní, ciodiche i zitadins refodëia tres deplü les dezijiuns dles istituziuns tutes ma da öna na pert. Sciöche ejëmpl positif nominâ Steger l’Assoziaziun provinziala di comerzianc. Tratan la fiera da Balsan dl 1990 s’â chësta damané ch’al gniss metü sö n ombudsman di consumadus do l’ejëmpl svedesc, por mioré le raport danter comerz y consumadú.

Ai 9 de ma dl 1989 ê Steger gnü confermé danü sciöche defensur popolar por la dorada de n’atra perioda legislativa. La relaziun anuala dl 1990 ê stada la ultima che Heinold Steger â metü adöm. Le pröm defensur popolar de Südtirol é mort d’aurí dl 1991. Tla sentada dl Consëi Provinzial di 11 d’aurí dl 1991 á la presidënta dl Consëi Provinzial Rosa Franzelin-Werth laldé l’aconsiadú provinzial da n iade cun chëstes parores:

„Ai 18 de forá dl 1985 êl gnü nominé le dot. Heinold Steger sön proposta dl Consëi provinzial de Südtirol cun decret dl Govern provinzial sciöche pröm defensur popolar de Südtirol. (...) Le Consëi provinzial de Südtirol â tut na bona dezijiun da chirí fora le dot. Heinold Steger sciöche defensur popolar. Te n cört tëmp êl sté bun da trasformé l’istituziun nöia, aladô dl spirit dla lege, te na portina por les retlamaziuns y les lamentanzes di zitadins, na portina por i problems dla porsona scëmpla. Sciöche defensur popolar s’ál dé da fá cun süa perseveranza y cun düc i mesi a desposiziun por defëne i dërc dl zitadin te süa batalia cuntra le burocratism tl’aministraziun publica: n compit che ê deventé por ël na dërta misciun, ch’al á ademplí cun gran ecuiliber y sensibilité y cun ci ch’al s’á tut para dales esperiënzes fates te sües inciaries importantes tla politica y tl’aministraziun. Por chëstes rajuns ti spetel sëgn na gran reconescënza y n dilan de cör da pert dl Consëi provinzial de Südtirol.“