Le laur mët man

Aladô dla lege é le defensur popolar oblié da presenté vigni ann na relaziun finala sön ci ch’al é gnü fat ia por l’ann. Les relaziuns anuales ti vëgn portades dant al Presidënt dla Junta Provinziala y a düc i aconsiadus provinziai. Ince sce le defensur popolar da dedô Werner Palla se lasciâ sö por le „püch interes da pert dla politica“, é les relaziuns anuales documënc importanc dla storia contemporana, ciodich’ares descrí les retlamaziuns y i fistidi dla popolaziun de Südtirol portá dant ann por ann. Daimpröma incá êl por la maiú retlamaziuns tl ciamp dl abité y dla sanité.

Les propostes de mioramënt de Steger ne gnô tl pröm nia tutes sö y de chësc ê le defensur popolar desplajü. Tla relaziun finala de so secundo ann d’ativité portâl porchël ćiamó n iade dant sües ghiranzes. „I termi massa strënc che ti vëgn metüs al defensur popolar ne le lascia nia lauré le miú ch’ara vá“, scrí Steger. Tl pröm gnô ël y sü colaboradus tuc sö dal’aministraziun provinziala cun malfidënza, impormó cun le tëmp êl sté bun da cherié n tlima de respet reziproch. Cotan plü davert y inant ê le Comun da Leifers. Bele tl 1986 orôl se garantí i sorvisc dl defensur popolar pian ia cun n svilup che foss impormó gnü a s’al dé ti agn Nonanta. Le Comun da Leifers minâ da podëi s’anuzé di sorvisc dl defensur popolar provinzial y ti â porchël scrit al Presidënt dla Junta provinziala. Chësc â indere refodé l’intenziun dl Comun da Leifers. Les condiziuns iuridiches por na te funziun dopla dl defensur popolar provinzial n’ê nia ciamó danman.

Daimpröma incá tolô le defensur popolar de Südtirol pert ales incuntades y discusciuns a livel nazional y internazional. Dantadöt laorâl tröp adöm cun l’Academia europeica dl ombudsman a Desproch. Steger ê inće tres intoronn fora por Südtirol y al porvâ cun süa gran ativité da reladú da fá conësce la Defenüda zivica sura döta la provinzia. So impëgn â porté sü früc: Tl secundo ann d’ativité gnôl registré bele passa 650 caji. Avisa sciöche bele le pröm ann â la maiú pert di caji da nen fá cun la repartiziun V dl’aministraziun provinziala, chël ó dí cun la urbanistica, le frabiché alisiré y la programaziun dl’economia. Te chësc ciamp gnôl registré bele ma 150 caji. Por le pröm iade á Steger metü adöm na sort de bilanz de intervenziun. 445 caji podô gní stlüc jö positivamënter, 121 negativamënter, 82 n’ê nia ciamó stlüc jö canch’al gnô metü adöm la brosciüra. L’ann do êl sté por le pröm iade passa 1000 zitadins che s’â anunzié pro le defensur popolar. La maiú pert di caji gnô indô registrá pro la repartiziun V. Chësc á dessigü da nen fá cun l’importanza y les funziuns de chësta repartiziun. La maiú pert dles interpelaziuns â da nen fá cun la creaziun de terac da frabiché, i imprësć por le frabiché y le sistem dl trasport, olache i zitadins se baudiâ ch’ara ne jô nia da rové ti paisc da na pert fora. Ince les intervenziuns pro l’aministraziun statala aumentâ, imprömadedöt chëres pro l’Istitut nazional por l’assistënza soziala (NISF). Te süa relaziun finala spliga Steger deplü iadi che chësc istitut ne toma pö gnanca te so ciamp de competënzes, impó ál dagnora dé inant ion informaziuns.