Contignü prinzipal
Dovëis nüs
Ala fin di agn Otanta gnôl amplié i ćiamps de competënza dla defenüda zivica. Cun la lege di 18 de agost dl 1988 nr. 33, articul 15 à le Consëi Provinzial invié le defensur popolar da se dè da fà ativamënter inće tl ćiamp dla sanité. Chilò gnôl ti pröms agn tres indô sö les medemes plüres: fai de tratamënt, sistemaziun di amarà a tëmp lunch y problems da reconësce la invalidité. Implü damana Steger le Consëi Provinzial de slarié fora sües competënzes inće ai comuns, sciöche al é bele le caje tla provinzia vijina de Trënt. La lege statala di 8 de jügn dl 1990, nr. 142, articul 8, paragraf 1, „Ordinamënt di ënć locai“, jô te chësta direziun.
„Lo statuto provinciale e quello comunale possono prevedere l’istituto del difensore civico, il quale svolge un ruolo di garante dell’imparzialità e del buon andamento della pubblica amministrazione comunale o provinciale, segnalando, anche di propria iniziativa, gli abusi, le disfunzioni, le carenze ed i ritardi dell’amministrazione nei confronti dei cittadini.“
A livel local, chël ô dì comunal, dêl gnì metü sö n defensur di zitadins aposta. Sciöche punt culminant dl ann definî Steger le secundo congrès europeich di defensurs popolars. „La sconanza di zitadins tla democrazia davagna tres na maiù importanza“, scrîel te süa relaziun finala. Le consëns danter zitadins y govern sarà determinant tl dagnì, ćiodiche an refodëia tres deplü les dezijiuns dles istituziuns tutes ma da öna na pert. Sciöche ejëmpl positif nominâ Steger l’Assoziaziun Provinziala di comerzianć. Dala fiera da Balsan dl 1990 s’â chësta damanè che al gniss metü sö n ombudsman di consumadus do l’ejëmpl svedesc, por miorè le raport danter comerz y consumadù.
Ai 9 de mà dl 1989 ê Steger gnü reconfermè sciöche defensur popolar por la dorada de n’atra perioda legislativa. La relaziun anuala dl 1990 ê stada la ultima che Heinold Steger â metü adöm. Le pröm defensur popolar de Südtirol morî d’aurì dl 1991. Tla sentada dl Consëi Provinzial di 11 d’aurì dl 1991 à la presidënta dl Consëi Provinzial Rosa Franzelin-Werth onorè l’aconsiadù provinzial da n iade cun chëstes parores:
„Ai 18 de forà dl 1985 êl gnü nominé le dot. Heinold Steger sön proposta dl Consëi Provinzial de Südtirol cun decret dl Govern Provinzial sciöche pröm defensur popolar de Südtirol. (...) Le Consëi Provinzial de Südtirol â tut na bona dezijiun da chirì fora le dot. Heinold Steger sciöche defensur popolar. Te n cört tëmp êl stè bun de trasformè fora dla istituziun dër metüda sö aladô dla lege na portina por retlamaziuns y n mür di lamënć dl zitadin, na portina por i problems dla porsona scëmpla. Sciöche defensur popolar s’àl dè da fà cun süa stranciosité y cun düć i mesi che al â a desposiziun por i dërć dl zitadin te süa batalia cuntra le burocratism tl’aministraziun publica. Le dot. Steger à vit chësc dovëi, che ê deventè por ël n dër dejidêr, cun gran atenziun y cun la esperiënza y la sensibilité, che al s’à fat tles inćiaries altes, te chëres che al à laurè tratan süa vita tla politica y tl’aministraziun. Por chëstes rajuns ti spétel śëgn reconescënza y n dilan de cör da pert dl Consëi Provinzial de Südtirol.“
| Titul | Download | |
|---|---|---|
|
L ie de bujën avëi nstalà l PDF Reader, acioche n posse giaurì y udëi i documënc tl format PDF che ie sun chësta plata. |
||
[Publicazions]
|
||
