Contignü prinzipal
Por le pröm iade n’ëra a će dla defenüda zivica
Do da Werner Palla gnôl metü cun Burgi Volgger por le pröm iade te Südtirol n’ëra sciöche defensuria popolara. La iurista imparada fora, insegnanta dles scores altes y mediadëssa te chestiuns penales s’â fat n inom sciöche presidënta dla assoziaziun „La strada - Der Weg“. Chësta assoziaziun à te Südtirol comunitês d’abitaziun por jogn, zëntri jonii y na comunité de terapia por drogà. D’aurì dl 2004 à Burgi Volgger surantut la inćiaria. Ara sotrissâ daimpröma incà la importanza dl mediadù tla defenüda zivica. Volgger se sforzâ atira de miorè la comunicaziun cun i ofizi y i impiegać. Volgger porvâ de mostrè sö trus nüs y de daurì portes nöies. Tres so laûr de convinziun ân tres demanco preiudizi cuntra la defenüda zivica y les tenjiuns bele dan man. I pröms früć podôn cöie tla colaboraziun cun les unitês sanitares. Dl 2004 gnôl metü sö ti ospedai da Balsan y Maran grups de laûr che se dê jö cun les retlamaziuns portades dant ala defenüda zivica. Inće na colaboradëssa dla defenüda zivica, che Volgger â inćiarié sciöche esperta por les chestiuns di paziënć, tolô pert a chëstes incuntades.
Te so pröm ann d’ativité êl stè passa 2.500 zitadins che â damanè aiüt pro la defenüda zivica. N terz de ëi se sintî tratà iniustamënter o nia coretamënter tl’aministraziun publica y chirî sostëgn da pert dla defensuria popolara. Le numer de chisc zitadins chersciô da ann a ann. N ater terz ê zitadins che chirî consëi, che n’orô gonot nia deplü co na consulënza debota y neutrala da pert dla defenüda zivica.
L’ultim terz ê metü adöm da dui grups. Chi zitadins che â bele baié cun düć i ofizi y politics y che damanâ, gonot inće por blota desperaziun, sciöche ultima istanza la defenüda zivica. Volgger scrî te süa relaziun anuala, „che ara se trata chilò por le plü de caji zënza speranza“. Chilò â la defenüda zivica le dovëi de ti comuniché ai zitadins che sües chestiuns ne podô nia gnì destrigades aladô de sü dejiders. Le secundo grup ê metü adöm da porsones cun dificoltês personales, gonot slizià te na situaziun de bojëgn soziala inće zënza n’avëi degöna colpa. Chilò nen jôra manco de na consulënza iuridica co plütosc de n aiüt vital concret. La defenüda zivica mantëgn n bun contat cun tröpes istituziuns soziales publiches y privates dla Provinzia, chi che chirî aiüt gnô porchël menà inant avisa y personalmënter te chëstes. Dl 2007 à por le pröm iade plü co 3.000 porsones chirì aiüt y consëi pro le defensur popolar.
Te so pröm ann à trëi d’atri comuns stlüt jö la convenziun cun la defenüda zivica. Insciö podô por le pröm iade sura le 50 porcënt di comuns y sura le 70 porcënt dla popolaziun damanè do informaziuns dal defensur popolar de comun. Le ressonn te chësc ćiamp ê ma inant alt. Al s’amudlâ dantadöt i caji por desturbs de vera tres locai publics y dl trafich che chersciô tres deplü. Nia ma i zitadins ne damanâ le defensur popolar, inće ombolć periâ la defenüda zivica do informaziuns por podëi tratè cer’ caji plü debota y te na manira nia burocratica.
| Titul | Download | |
|---|---|---|
|
L ie de bujën avëi nstalà l PDF Reader, acioche n posse giaurì y udëi i documënc tl format PDF che ie sun chësta plata. |
||
[Publicazions]
|
||
