Contignü prinzipal
Le laûr mët man
Aladô dla lege é le defensur popolar oblié da presentè vigni ann na relaziun finala sön ći che al é gnü fat tratan l’ann che se stlüj. Les relaziuns anuales ti vëgn metüdes dant al Presidënt dla Junta Provinziala y a düć i aconsiadus provinziai. Inće sce le defensur popolar da dedô Werner Palla se scialdâ porvia dl „püch interès dla politica“ ales relaziuns anuales, éres documënć importanć dla storia contemporana, ćiodiche ares descrî les retlamaziuns y i fistidi dla popolaziun de Südtirol por l’ann portè dant tla relaziun. Daimpröma incà â les retlamaziuns tl ćiamp dl abité y dla sanité la maiù importanza.
Les propostes de mioramënt de Steger ne gnô tl pröm nia tutes sö y de chësc ê le defensur popolar desplajü. Tla relaziun finala por so secundo ann d’ativité portâl porchël ćiamò n iade dant sües ghiranzes. „I termi massa strënć che ti vëgn metüs al defensur popolar é n impedimënt“, scrî Steger. Tl pröm gnô ël y sü colaboradus tuć sö dal’aministraziun provinziala cun malfidënza, impormò cun le jì dl tëmp êl stè bun de cherié n tlima de respet reziproch. Plü modern deperpo se desmostrâ le comun da Leifers. Bele dl 1986 orôl se garantì i sorvisc dl defensur popolar y piâ ia insciö cun n svilup che é impormò gnü metü en pratica ti agn Nonanta. Le comun da Leifers minâ che an podess s’anuzé di sorvisc dl defensur popolar provinzial y ti scriô porchël al Presidënt dla Junta Provinziala. Chësc refodâ indere la intenziun dl Comun da Leifers. Les condiziuns iuridiches por na te’ funziun dopla dl defensur popolar provinzial n’ê nia ćiamò cheriades.
Daimpröma incà tolô pert le defensur popolar de Südtirol ales incuntades y discusciuns a livel nazional y internazional. Dantadöt cun l’academia europeica dl ombudsman a Desproch êl n gran barat. Steger ê inće tres intoronn fora por Südtirol y al porvâ d’aumentè cun süa gran ativité da reladù le livel de popolarité dla defenüda zivica sura döta la provinzia. Cun suzès gnôl registré le secundo ann d’ativité bele passa 650 caji. Avisa sciöche bele le pröm ann de raport â la maiù pert di caji da nen fà cun la repartiziun V dl’aministraziun provinziala, chël ô dì cun la urbanistica, le frabiché alisiré y la programaziun dla economia. Te chësc ćiamp gnôl registré bele ma 150 caji. Por le pröm iade à Steger metü adöm na sort de bilanz de intervenziun. 445 caji podô gnì stlüć jö positivamënter, 121 negativamënter, 82 n’ê nia ćiamò stlüć jö canche al é gnü metü adöm la brosciüra. L’ann do êl stè por le pröm iade passa 1000 zitadins che s’â anunzié pro le defensur popolar. La maiù pert di caji gnô indô registrà pro la repartiziun V. Chësc à dessigü da nen fà cun la importanza y i dovëis de chësta repartiziun. La maiù pert dles interpelaziuns â da nen fà cun la creaziun de terac da frabiché, i credić tl ćiamp dl frabiché y le trasport. Chilò se dessenâ i zitadins dantadöt porvia che ara ne jô nia da rové te paîsc da na pert fora. Inće les intervenziuns pro l’aministraziun statala aumentâ, imprömadedöt pro l’Istitut nazional por l’assistënza soziala (NISF). Te süa relaziun finala spliga Steger de plü iadi che chësc istitut ne toma pö gnanca te so ćiamp de competënzes, impò àl dagnora dè inant ion informaziuns.
| Titul | Download | |
|---|---|---|
|
L ie de bujën avëi nstalà l PDF Reader, acioche n posse giaurì y udëi i documënc tl format PDF che ie sun chësta plata. |
||
[Publicazions]
|
||
